A la fhera do nord.......!
Turismu, istruziona, sanità,
Quantu furu i sordi verzu ccà ?
A fhera do turismu artiggianatu,
Milanu fhà fhesta, fhà mercatu.
--*--
A fhera e Milanu è nazionala,
Nord sud tuttu è qualità,
‘U gorgonzola a provula silana,
Sozizzu Barolu cchci ti sana.
--*--
E jivi a li stand de calabbrisi ,
Cipuddha de Tropea u bergamottu
Ma na risata a fici a lu vidira,
U bufhularu comu n’ omu mortu.
--*--
Ci sunnu vindituri pocu esperti,
A lingua italiana on ti l’aspetti,
Vestuti ccu maglioni do paisa,
Aspettanu clienta ma fa spisa.
Si vida ca on sannu chi vindira
Macari sanu bbonu ogghju d’oliva,
Diamanta cedru capsula piccanta,
Bagnara bergamottu ddhà si vanta.
--*--
Cutrona a sardella a pitta nchjusa,
‘U pecorinu tostu è qualità,
Vibbu ndujia russa nto gudeddhu,
Ccu carna ‘e maiala pipareddhu.
--*--
E Catanzaru porta non si sà ,
Duv’è u prodottu e ‘sta città,?
Morzeddhu pipareddhu e tanti risi,
A genta non da vò e si nda và.
--*--
Na cosa quetu quetu m’accattavi,
Na tazza ‘e cafè ma sorseggiavi,
Parravi cu barrista e Catanzaru,
Ciau Totò << a postu !?>> mu calavi !
Turismu, istruzziona sanità,
Quantu furu i sordi verzu ccà ?
Ma non sapimu a volu progettara,
I tanti sordi da comunità.
--*--
Baroni capi d’enti nta reggiona,
Si pappanu sta torta d’occasiona,
Dinari tanti voti e po’ tangenti
Politici impastati a delinquenti.
--*--
Ma na risata a fici a lu vidira,
A rrobba e Catanzaru cchi bontà
Bancali e pipareddhi e suppressati,
U bufhularu a metru , cchi mandati ?
--*--
U gustu è delicatu ccà nto nord,
U gorgonzola e crapa cchi finezza !
Formaggiu ccu carboniu vegetala
U pipa u tritolu on ‘interessa !
E quantu boccacci e pipareddhu,
Russi suppressati , cchi ribeddhu !
‘U bancu para tuttu nsanguinatu,
Do sangu de na fhaida nto mercatu.
--*--
Portati a prima cosa vendituri,
I fhimmani cchju beddhi da città,
Chi parranu a lingua taliana,
E de cultura storia santità.
--*--
Mbentati a Catanzaru ncuna cosa ,
Nde sunnu artisti veri a ‘sta città ?
On c’esta nu prodottu originala,
Cchi fà nchjanara u pil , a verità !
--*--
A terra da Calabbria è rinomata,
Sula mara terra a cipuddhata,
Ma cu ni presenta nta naziona,
Politica coraggiu e televisiona.
Parigi si lamenta e n’invenziona,
Picassu u decollage resta ccà ,
Milanu ni cacciàu disperaziona,
A megghju arta e sta specialità.
--*--
Du quatri ni mandàu l’assesoratu ,
Ppa fhera do turismu artiggianatu,
Na tila ccu nu puntu niru niru,
Ma quala paesaggiu , nu raggiru!
--*--
Politici attenziona Bossi è stancu,
Ancora on sapiti cchi v’aspetta,
Calabria santa unita federala,
Vi chjudanu a vrachetta do stivala.
--*--
Sa storia a canuscimu è sempa eguala,
Ciangiti a terra a manu e delinquenti,
U nord manda sordi ppe sanara
A panza cchjna ccu finanziamenti.
Autore M. Badolato